¡¡Ye la guerra!!

"Van prohibinos la sidra?Ye lo que se pregunten tolos asturianos con voz temblorosa y el corazón encoyíu de llercia. Porque si tala cosa ocurre: ¿con qué vamos acompañar el quesu y los bígaros y los centollos y la tortiella de pataques y los güevos cocíos?¿Cómo vamos relacionános colos demás?¿Qué faremos les tardes de los vienres (y les de los sábados, domingos, llunes, martes, miércoles...)? ¿Tomaremos coca-cola nes verbenes?¿Les espiches serán con mirinda y seven-up, o pior: con vino español?¿Ónde diremos a falar de política y iguar el mundu?¿Será'l fúbol lo mesmo?¿Nun dexaremos de ser lo que somos, o seya, asturianos o cosa parecida?¿Qué va pasar cola nuesa música, les nueses tradiciones, la nuesa cultura, el nuesu folclor?¿Siguirá'l mundu caminando?¿Escurrerá'l cielu y caerá un gran mantu de lluvia y fueu qu'acabará cola vida tal como la conocíamos?
Nun llegará'l sangre al ríu. En cuantes entamaron a sonar los primeros clarinos d'una llei del Ministeriu de Sanidá que va considerar la sidra bebida alcohólica (y quedando, polo tanto, restrinxíu'l so consumu a ciertos espacios y condiciones), tolos partíos y representantes de les fuerces vives asturianes tán faciendo esfuerzos pa que nun se cometa esi disparate.¿La sidra bebida alcohólica? Si ye lo que tomen los guah.es pa comer en Villaviciosa. Si nun hay neñu asturianu que nun tomara'l primer culín a la tienra edá de 5 o 6 añinos. Si ye pura melecina, que val pa depurar l'organismu y facilitar la micción. Estos madrilanos tan llocos. Ya lo dicía'l mio primu Delio, y dicíalo talo como lo trescribo equí:"Tomes vino y cubalibres y vas pa casa enfiléu, pero tomes sidra y llegues con gana de facer l'amor"
Pémeque'l Ministeriu entrará en razón. Y si non, lo del Naval va ser flores al lláu d'esto, porque dalgo tienen claro los asturianos ye que la sidra nun se toca. Que marchen cola industria, que desanicien les mines, que vendan les eléctriques, pero la sidra ye sagrao: ye la nuesa razón de ser nel mundu. Un asturianu ensin sidra ye mediu asturianu, mediu paisanu, medio ser humanu, mediu nada. Colo guapo que ye pasar pol Parque San Francisco un sábadu pela tarde y ver a los padres deprender a los neños escanciar. L'otru día taba na sidrería asturiana de Punta Umbría y había ellí un paisanu que me vio tomar sidra y pola manera q lo facía, correctamente, supo él que yo yera de la tierra. Ellí echamos una parolada curiosa y bebimos n'amor y compaña unes cuantes botelles. ¿Cómo díbamos reconocer un compatriota sin nun fuera pola sidra?
Entrará en razón, sí. De lo contrario, dinamita. Y si eso nun soluciona'l problema, pues ellos verán: van convertir Asturies nuna especia de Chicago años 20. Pensarémos maneres de facer contrabandu, ocultaremos la sidra n'imáxenes de santos, en xarrones chinos, en falses caxes de muertu. Les sidreríes reconvertiránse en clubs privaos y nellos correrá la sidra a mamplén. Cuando la policía s'arime perellí, el porteru dará l'avisu, dalguién apretará un botón y pondráse en marcha'l mecanismu que camuda la barra por un altar y les meses por bancos d'ilesia. Los axentes verán una congregación religiosa de lo más inocente.
Habrá tiros peles cais d'Uviéu y Xixón, axustes de cuentes tipu la matanza del día San Valentín, figures del contrabandu que col tiempu serán cásique mítiques. Tornaremos al alambique. Cada casería producirá la so propia sidra clandestino. Pañar mazanes será tan emocionante como vender discos y películes pirates na cai. Toos vamos ser negros y chinos de la botella verde. "Axuntábense" será un himnu de llibertá prohibíu, como "Els segadors" o "La Internacional" cuando Franco.
Contra les asechances de Sanidá, resistencia. ¡Ciudadanos d'Asturies, salir a defender lo vueso, l'oru líquido de la sidra, esa espluma blanca nel culín bien echáu, cola promesa la felicidá y bienestar qu'enciarra. Oh, sidra, tu que mueves el mundu, tu que yes la nuesa carne y el nuesu sangre. Tu que yes la vida. "

Si d'alguien quier el testu espublizáu'n castellán que lo diga, yo respeto la llingua na qu'aparez en Les Noticies.

pD. Nun creo que yo beba cocacola nes verbenes, si piso práu en branu échaseme enrriba'l brazu el solín. Nun creo qu'haya congregración relixiosa que paeza inocente, ya te digo, nun creo. Y sí, esi paisanu sin sidra nun ye ná, canciaben los paisanos nel bar de mio guela, canté munches vegaes baxando de El Parnés, práu de Veguín onde se celebraba la gira de les, angüañu, mítiques fiestes de Veguín.