Acuérdate de min...

"Mar, namorada terne d'aquesta Ribesella,
que coles foles beses y alluries col to son,
que cantes nes sos peñes, que dexes na so oriella
granes de sal que güelvense de miel pal corazón...

Non ruxas espantible, non muerdas nes orielles
nin les arenes rinques con gufos de rabión;
que paez que t'amiren con pena les estrelles
cuando t'azotes, lloca, nos cortes del peñón.

Trai el besu marinu que l'airiquín aruma
dempués que la turmenta remata de ruxir;
esponxa nos peñedos la ñeve de to espluma
y troca tos glayíos en sele sollutir...

Trai, de la ñidia rede que fan los tos cristales,
los rellumes d'estrella que dan al tapecer;
la ñeve les tos pelres, la flor los tos corales,
cuando en resalsies d'agua entamen resplander.

Sé qu'abeyáu en senu añeres el tesoru
más ricu y petecible qu'algama ún a suañar;
que tienes fueyes d'ámbare, qu'ancultes roses d'oru,
carámbanos de plata y estrelles de la mar.

Sé qu'en llucientes cónchares y n'agües les más pures
de requexos que ñunca batió la vagamar,
canten al son del pielgu mil carros de cretures
blanques como les flores de l'espinera albar...

Ven, y l'escasa llume que tengo amortiguada
nes ascues dormilientes, en llar del corazón,
amorosa, que pueda faver yo una tonada
del cantar de to espluma al delicadu son.

Y aquel marmullu trémbole qu'encanta y que namora
y qu'al alma un tesoru de mil fechizos trai
vas emprestá-ylu a otra que sospira o que llora
por beber l'Agua Santu de la Fonte del Cai.

A ver si por mio suerte dubiés acertáu nella
y quixés Dios qu'al alma la mio canción llegás;
que con tal que la escuches con gustu, Ribesella,
al home que la fixo yá non-y pruye más.

Pero, mio Ribesella: si en daqué romería,
a la soma d'un árbole, na vera d'un camín,
oyés que dalgún echa la tonadina mía,
si ti llegás al alma... acuérdate de min."



Ribesella, de Igor Medio y Lisardo Prieto, del discu DUAL. A min, qu'hubi parar por ellí tantes vegaes, respíngame enteru. Ye verdá, la meyor canción del folk asturianu del l'últimu añu.